6.2.05

جبال لبنان


مصدر وحقوق الصور تعود الى موقع mountains-of-lebanon

جرود الهرمل بعدسة فيليب صالح. صورة أكبر.

ما كان هيّن انو تنقي صورة من صور فيليب صالح لحتى تكون بمقدمة المقال. ومتل ما وعد، كل الصور بالغاليري، كانت غير الغاليريات التانيي يللي بتحط صور تقليدية عن صور وصيدا وبعلبك. وهيدا بالضبط يللي نجح فيه موقع جبال لبنان Mountains-of-Lebanon، ويللي من اللحظة الاولى بتعرف انو عم تشوف صور غير شكل، بتذكرك بكادرات الافلام المصورة في غرب أميركا أو جزر تايلند، على كترة ما شفناها، ناسيين انو الخالق أعطانا متل ما اعطى الآخرين، ويمكن بالضبط، قطعة الجنة هون... بجرد ضيعتك.

الموقع من تصميم مي فواز، يللي اختارت الوان خريفية وشتوية، حتى تكون ملايمة للمياه الغزيرة والوان ورق الشجر البرتقاليي. وحاول الموقع بجهد انو تشوف الصور بسرعة، وهيدا احيانا بيكون اوقات على حساب جودة الصور على الانترنت.

ولحتى اقدر اختار اجمل الصور، قلت بقرارة نفسي انو بدي اختار صورتين ما عندي منن بالبيت، فطلع معي صورة غروب الشمس من صنين وصورة الشلالات ببعقلين. وعجبتني فكرة كتاب الموقع للنشاطات، وزعلت فعلا اني ما قدرت احضر المعرض. بيبقى اتمنى انو شوف كتاب بيجمع كل الصور يللي بيتضمنها الموقع.